Gaariye “Ra’yiga Waan Kugu Diidi Karaa, Waxaanse Naftayda U Bixinayaa In Aan Fikraddaada Lagugu Cabudhinin”

Gaarriye
“Ra’yiga waan kugu diidi karaa, waxaanse naftayda u bixinayaa in aan fikraddaada lagugu cabudhinin” sidaa waxa yidhi
Abwaanka weyn ee Maxamed Xaashi Dhamac “Gaariye” oo aanu wax ka wayddiinay xadhiga Siyaasiyiinta Ururka Qaran.
Maxamed Xaashi Dhamac “Gaarriye” oo faahfaahin ka bixinaya aragtidiisa ku aaddan xuquuqda aasaasiga ah ee qofka ayaa sheegay in wixii kalaba warwareeg yeelan karaan laakiin xaggiisa ay lama taabtaan yihiin xoriyatul-qawlka iyo xaqa xorriyadda fikirku. Abwaanku waxa uu tilmaamay in cabudhinta fikirku ay waqtigan dunida gabaabsi ka tahay Somaaliland oo qaran cusub ahna aan looga fadhiyin inay caalamka daba marto.
Abwaan Gaarriye waxa uu ku celceliyay in abuurta dadku kala duwan tahay taasina ay keento faraqa afkaartooda, laakiin ay lama huraan tahay in qofku ku talo galo oo aanay keenin isku dhac wadada ka duwa.
Maxamed Xaashi dhamac oo si gaar ah uga hadlaya raga xidhan ee Madaxda ka ahaa Ururka Qaran ayaa sheegay in aanu isagu xisbiyada kala raacin oo uu dhexdhexaad ka yahay ,balse uu dhiirigaliyo korriinkooda, isaga oo sida uu sheegay ka rajo qaba inay maalin uun gaadhi doonaan halkii uu ku riyoon jiray, oo uu ku tilmaamay inay tahay maalinta uu qarankani ka mid noqdo qaramada dunida isaga oo leh dhaqanka lagu majeerto dawladaha liibaanay.
Abwaanku waxa uu intaa ku daray “kollaba anigu ma qabo in xadhiggu xal yahay, waliba ka xarriyatul-qawlka lagu cabudhinayo”. Abwaan Gaarriye gabagabadii hadalkiisa waxa uu xukumadda ka codsaday in siyaasiyiintan xorriyaddooda loo soo celiyo , khilaafkana lagu dhammeeyo wada hadal iyo dhaqankii heerka innagu soo simay.

Quluub Ballansan Oo Qosol Isku Qaabilay Khasaarihii Dhaqaale Ee Ugu Ballaadhnaa Dushiisa

Hargeysa (Saxan)- Shalay gelinkii hore waxa tacsi u tagay xaruntii warshada furaashyada ee gubatay, masuuliyiin tiro badan oo mucaarid iyo muxaafidba leh, saacadihii horeba waxa goobta ku kulmay wajiyo isu oomanaa, oo ay salaantooda ka muuqatay in ay haatan isu uur-san yihiin.
Wasiirka Maaliyada Xuseen Cali Ducaale (Cawil), ayaa u soo dhaqaaqay dhinacii baabuurka uu ka degayay guddoomiyaha xisbiga Kulmiye Axmed Maxamed Maxamuud Siilaanyo, waxaanay isku qaabileen bariido waji furan oo ay ka muuqato in ay haatan isaga soo dhawaadeen intii hore qadar daqiiqado ah oo danbena kaftan aan cidi ku wehelinin ayay isku kaliyaysteen.
Halkaa waxa ku sugnaa dad aan sidaa u badnayn oo isugu jira dadka masiibadu cuskatay ee ka shaqayn jiray warshada, mulkiilayaashii iyo dad rayid ah oo daris la ah.
Axmed Siilaanyo, oo ay ka muuqato sida uu uga xun yahay maqaadiirta cuskatay warshada furaashyada ayaa ku tiraabay tacsi uu gaadhsiiyay mulkiilayaasha iyo shaqaalaha, waxaanu yidhi “Aad baan uga xumahay maqaadiirtan, ILLAAHAY waxaan ka baryayaa cawil naqeeda wanaagsan in uu idin siiyo”.
Siilaanyo waxa uu intaa raaciyay dhaliil meel fog ka soo go’day oo aan markan u eekayn mid uu xukuumada ku durayo, haddana aan ka fogaan Karin “Wax lala yaabo weeye, dawlad 16 jirsatay oo aan lahayn baabuur dab demis ah, oo calaqal nus badbaadiya”.
Qadar daqiiqado ah dabadeed waxa goobta isku soo gaadhay madax ay markii danbe si aad ah uga dhex muuqdeen wasiirada firfircoon ee xukuumada qaarkood.
Siciid Sulub, oo markan u taagnaa difaaca xukuumadda iyo tacsida dadka ay masiibadu ku dhacday labadaba, ayaa isaguna magaca madaxweynaha iyo ka xukuumadaba dadkii halkaa joogay ku gudoonsiiiyay dhambaal tacsiyeed oo uu ku muujinayo sida ay ula wadaagayaan dhibaatadan.
Wasiirka warshadaha Maxamed Saleebaan Weyne oo daadihinaya Hay’adda UNDP, kana turjumayay laba mas’uul oo Hay’addaa ka socday ayaa isaguna goobtii ka sheegay in ay xukuumadu itaalkeeda samaysay walina ku talo jirto gargaarka ay ka gaysan karto mashaqadan.